Genesis = KÛNGRUI 1

0INTRODUCTION: KÛNGRUI Chonglamsât Kûngrui irakip ahongkanthui chong ani. Ramual ankhat-om mihring-ngâihi kutsinna sinna, wanuaiya siad ankhat-om pông khodengthei i-hong kanthuina, ankhat-om Pathian ning mi-ngâile ikantopna lam-ngâihi hiwa thiambuning anaripe ani. Kûngrui hi asuam ani-ya khuisen ajôt. 1 Akûng 1—11 Kutsin ramualhi sinna ankhat-om mihring-ngâi arapa anhong kanthuina rochi. Adam le Haowa, Ken le Abel, Noah le tuichanglian, ankhat-om Babel chung-in-ngâi. 2 Akûng 12—50 Israel mi-ngâi anpa anpu-ngâi rochi. Aphutnatak “Abraham” Pathianjiang tak-ngâi ankhat-om ri-ngâi ani. Hale ahong kanjom thengnga Abraham nâi Isak, Isak anâi Jakob (Israel tia om ankui), Jakob anâi sômleini, Israel phung hong keithuina ni. Hale anâi Josep hiyom anâi kârra alûtkhat ani, butâng phahan Mizraim-ma omrangnga Jakob le anâi-ngâi insûng limle iluihong tuang ani. Hiwa thiambuning mihring hongsuakna rochi ana ri-pe, Pathian ning aphutna-wa i-mo iluitho tia, Pathian ning simlei hi aluisin khet tia phutna anei, achung chuanna hiwa thiambu apum puining arijôtko Pathian nunchan hi ani, adiklui tho-ngâijiang chongtanna le tanti pêkna, ami-ngâi sannale Kairuai-na ankhat-om anrochi-ngâihi ani. Hiwa thiambu anlui-i hiko mihring-ngâi antak-ngâinahi man hringnga mandet narangnga ani. Achongsuam Ngâi Akutsin ramual ankhat-om mihring sinna (1—2) Siat ankhat-om pông khodengthei ahong phutna (3—24) Adam tenna Noah (4—5) Noah ankhat-om tuichanglian (6—10) Babel chung-in (11.1) Shem tenna Abram (11.10) Pu le puthui: Abraham, Isak, Jakob (12—35) Esau chileshôn (36—45) Josep ankhat-om a-u-ngâi (37—45) Israel-ngâining Mizraim-ma (45—50)

1Aphutna han Pathian ning vânram-ngâile simlei aluisin.

2Simlei amêlkhet lui-omma aluirongkong, ajîngning amâi-ya thûp-a aluikhûde. Pathian Rathathiangning tui-ngâi chungnga aluilôn.

3Pathian ning awâr omrase atile awâr alui-om.

4Pathian ning awârha aluimu, asat ha amu-a alung aluibe, amaning awâr tenphût ajîng aluikhuisen.

5Pathian ning awârha sûn tia aluiphua, hale ajîngha jân tia aluiphua. Hale nitâk ankhat-om jîngtiang nikhua phutna aluini.

6Hale Pathian ning ati, tui-ngâi kongkârra vânjôl hong-omrase hale tui-ngâi tenna anphut tui-ngâi kankhuisen rase.

7Hale Pathian ning vânjôl aluisin, hale vânjôl anuaiya a-om tui-ngâi ha vânjôl achungtenna a-om tui-ngâi tenna aluikhuisen, hale hanganhan aluini.

8Pathian ning vânjôl ha vânram tia aluiphua. Hale nitâk ankhat-om jîngtiang nini changna aluini.

9Pathian ning aluiti, vânram-ngâi thuaiya tui-ngâihi amun khat-a kanchun rase-u, hale tânghul ha wasuak rase, hale ha-ngahan aluini.

10Pathian ning tânghul ha simlei aluiphua, hale tui-ngâi amankanchunha tuipuilian aluiphua. Hale Pathian ning asat ha amu-a alung aluibe.

11Pathian ning simleichungnga anlena, ara-om, nîm-châng hale ara-om thing-kûng aratin kip-a wasuak rase aluiti. Hale hangahan aluini.

13Hale nitâk ankhat-om jîngtiang nithum changna aluini.

14Pathian ning vânram-ngâi kârra awâr hong-omrase aluiti, hiwa hining aphât, nikhua, ankhat-om kumletha khuisen narangnga ber ani;

15hale simleiya awâr pêknarangnga vânram kârra vânjôlla awâr hong-om rase atile hanganhan ahongni.

16Hale Pathian ning wâr alianpa anni asin, alian-det awârhaning sûnna wâi ahôm, ankhat-om asin-det awârhaning jânna wâi ahôm, arsi-om asinde.

17Pathian ning simlei chungnga awâr êl narangnga vânram kârra vânjôlla asiakjui ani,

18sûn le jân wâihôm narang, ajîngtenna awâr khuisennarang ani. Pathian ning asat ha amu-a alung aluibe.

19Hale nitâk ankhat-om jîngtiang nimanli changna aluini.

20Pathian ning aluiti, “Tui sûngnga akanchek alôn manmasi aratin kip-a hale simlei achungnga chungvân kârra vânjôlla awuang wâ changtak hongkanchui rase-u,”

21Pathian ning nga-liantak ngalianpa ankhat-om tui-tenna awasuak manmasi rakip aratin kip-a hale atha a-om wâ rakip aratin kip-a aluisin, Pathian ning asat ha amu-a alung aluibe.

22Pathian ning phual aluipêk, nangni ara-om achitam ha niru, tuipuilian sûngnga tuihan sipru hale wâpea-wahâining simlei chungnga hongtamru aluiti.

23Hale nitâk ankhat-om jîngtiang niranga changna aluini.

24Han Pathian ning aluiti, simleichung tenna manmasi aratin kip-a insâ, ramsa, ankhat-om akanchek-a avonna alôn irakip aratin kip-a hongsuak rase. Hale hangan aluini.

25Pathian ning simleiya ramsa aratin kip-a, insâ aratin kip-a, ankhat-om manmasi-murshi-phâiwâng irakip akanchek-a avonna alôn aratin kip-a, aluisin. Pathian ning asat ha amu-a alung aluibe.

26Hale Pathian ning aluiti, keini ramil angnga, keini mêlpua, mihring hi sintarei, hale anmani ning tuipuilian na a-om ngâ rakip, wâpea-wahâi Chungvân kârra awuang rakip, hale simlei chungnga, insâ, ramsa, akanchek-a avonna alôn rakip wa-ensui rase-u.

27Hingahin Pathian ning ama atak-tak mêlpua ramilla mihring aluisin, numei le pasal aluisin.

28Pathian ning phual apêk-a aluiti, nangni ara-om achitam ha niru, watamru simlei pumpui-ya wasipru hale simleihin nga-ngâi chunga, chungvân kârra awuang wâ-ngâi chungnga hale ahringkhuanei sâ, manmasi-ngâi chungnga torna waneiru.

29Hale Pathian ning aluiti enru, simlei amâi-ya a-om ara-om chimu-âikha, hale thingkûng theira aru-om, nangni châk-le-nêkrang keining nangnijiang kanapêkjui.

30Hale simleiya ramsa rakip, wâpea-wahâi rakip, manmasi-murshi-phâiwâng irakip ankhat-om ramsûl ana-êm rakip-ngâihi-om châkrangnga kana pêkjui ani aluiti, hale hangahan ahongni.

31Han Pathian ning aluisin phur rakip ngâiha a-enna aluimu-a, alung atam aluibe. Hale nitâk ankhat-om jîngtiang nikaruk changna aluini.