Genesis = KÛNGRUI 2
1Ha-nga han vânramngâi le simlei ankhat-om sûngnga om irakip arêng pumma aluisin suajui.
2Nisari changnahan Pathian ning achuansin rakip aluitor hale nisari changna han achuansin rakip tenna pôngkansakna aluinei.
3Pathian ning nisariniha phual aluipêk-a aluimanthiang, ajârko Pathian ning phursin asintho rakip tennaphût pôngkansakna aluinei.
4Hiwa hi chungwânle simlei aluisinlâi rochi ani. Yehovah Pathian ning hawa phât han simlei le vânram aluisin.
5Ramlâi-ya thingkûng lungkûng simlei hin luimongma, simleichungnga ramlâi-ya anlena, sûl luimongma ajârko Yehovah Pathian ning simlei hin ruo laman thoma, hale mihringning luikâr luitho la-omma,
6tâk-ha simleichung tenna tuirahu sûmphâi ahong suak-a simlei amâi-ya aluijilla alui-om.
7Han Yehovah Pathian ning leipâk tenna wut-a mi aluisin ankhat-om anârra aphûk alui-sêmthuanna mihi ahringkhuo-om mihring ahongchang.
8Edenna Nisua tianghan Yehovah Pathian ning rahuan aluisin hale hawahan iluisin mihringha aluithun.
9Yehovah Pathian ning enna asat, châk-le-nêk rakip leipâk tenna amanmông; rahuan alâihan hringna thingkûng ankhat-om asiad asat tentanna thiamna thingkûng aluimông.
10Rahuanna tui munarangnga Eden tenna tuidung angkhat alui-om hawa tennahan tuikuong asuam manli-ya aluihong suak.
11Arapatak aming Pishon anti rângkachak omna mun hawa tuikuongning Hawilak râm pumpui-ya alôn
12Hale hawa râmma rângkachak ha asat, bedolak le soham-lung mantam a-om.
13Anni changna tuikuang hi Gihon ani, hiwa tuidungning Kûs ram pumpui-ya aluilôn.
14Hale anthum changna tuikuang hi Hiddekel ani, hawa tuidungning Assûr nisuatiangnga alôn. Ankhat-om manli changna tuikuang hi Perât ani.
15Yehovah Pathian ning Eden rahuan ensuirang ankhat-om sinhei rangnga mihringha aluisiak.
16Yehovah Pathian ning mihringpajiang chongpêkna aluinei, “rahuanna a-om thingkûng lim châk ajotpet.
17Tâk-ha asiad asat tetanna thiamna thingkûng hako châkthei noniche. Nachâkni tenna nithijiak rangke.”
18Han Yehovah Pathian ning hiwa mihringpa abing jâk-a i-omhi satmak, keining amale kanhuirang asap changrang asanrang ankhat sinpekati aluiti.
19Yehovah Pathian ning simlei ramlâi-ya ramsa rakip, chungnga awuang wâ-ngâi rakip aluisin; hiwa rakip-ngâihi pasalpaning aming phua narangnga amajiang aluihongchôi, mihringpa ning manmasi-ngâi anming akuina ha anming achangjui ani.
20Mihringpa Adamning manmasi rakip inna insâ, awuang wâ rakip, ramlâi-ya ramsa rakip-ngâi chungnga anming aluiphua. Tâk-ha Adam sanrangnga ikanhuirang khatten lui-omma-u.
21Hawa jârra han Yehovah Pathian ning mihringpa ha ahui tak-a aluiman-inbirra, amajiang tenna akângru ankhat akhek-a hale taksa aher alui-ya aluisinhei.
22Yehovah Pathian ning mihringpajiang tenna aluikhek kângru tenna numeinu khat aluisinjui, numeinu ha mihringpajiang aluihongtuang.
23Han mihringpa Adamning aluiti, “Atunko hiwa sâru hi kei kasâru ani taksa hi kataksa ani, amahi numei tia kuirang kani ajârko amahi pasal tenna anlui ani.”
24Hawa jârra Pasalning apa le anu mâknata anumei ruai nata tak-khatjak changnanti.
25Mihringpa Adam le anumei ha puanbui dearbui anluini tâk-ha jak luijet ma-u.